Helgi í Góu malar enn gull á djúpsteiktum kjúklingi – 235 milljónir í arð á fimm árum
KFC skyndibitakeðjan hér á landi heldur áfram að mala gull fyrir Helga Vilhjálmsson, sem kenndur er við Góu. KFC hagnaðist um 110,5 milljónir króna árið 2015, samkvæmt nýbirtum ársreikningi félagsins. Hagnaðurinn dregst heldur saman miðað við árið á undan þegar hann nam rúmum 120 milljónum króna. Íslendingar virðast þó ekki minna sólgnir í djúpsteikta kjúklinginn þar sem vörusala KFC í fyrra nam ríflega 2,5 milljörðum króna, samanborið við 2,4 milljarða árið áður.
KFC ehf. rekur átta veitingastaði á höfuðborgarsvæðinu, Selfossi og í Keflavík. Helgi Vilhjálmsson er eini eigandi félagsins og framkvæmdastjóri. Líkt og árið á undan greiðir Helgi sér 50 milljónir króna í arð út úr félaginu í ljósi góðrar afkomu, ofan á þau laun sem hann fær sem framkvæmdastjóri og námu 11,6 milljónum króna í fyrra. DV hefur undanfarin ár fjallað um velgengni KFC og Helga en árin 2014 og 2015 virðast hafa verið sérlega góð. Síðastliðin fimm ár, frá 2011 til 2015, hefur hagnaður KFC numið alls 422,8 milljónum króna. Á sama tíma hafa arðgreiðslur til Helga, sem eina eiganda félagsins, numið 235 milljónum króna.
Til að setja arðgreiðslur síðastliðinna fimm ára til Helga í samhengi fyrir aðdáendur KFC þá dygðu þær til að kaupa 217.794 Zinger Tower-kjúklingaborgara á 1.079 krónur stykkið.
Miðað við vörusölu KFC upp á 2,5 milljarða króna í fyrra má sömuleiðis segja að Íslendingar hafi keypt sér 2.316.960 Zinger Tower-borgara. Eða sem nemur um sjö borgurum á hvert mannsbarn á Íslandi.
Ár | Hagnaður KFC ehf. | Arðgreiðslur |
---|---|---|
2015 | 110,5 milljónir | 50 milljónir |
2014 | 120,5 milljónir | 50 milljónir |
2013 | 41 milljón | 50 milljónir |
2012 | 92,8 milljónir | 55 milljónir |
2011 | 58 milljónir | 30 milljónir |
Alls | 422,8 milljónir | 235 milljónir |