Að sögn bresku pressunar er karlanginn mjög inn í sig og til baka. Svokallaður introvert eða einfari og öll athyglin í kringum væntanlega hjónavígslu dóttur hans á laugardaginn leggst ekki nógu vel hann.
Slúðursíðan TMZ hefur eftir Thomas að hann ætli bara að bakka út úr þessu öllu og halda sig heima en planið var að hann myndi leiða dóttur sína upp að altarinu.
Tilefni fjaðrafoksins eru ljósmyndir sem systir Meghan, Samantha, lét taka af föður þeirra til að bæta ímynd hans sem henni þótti víst ekki nógu góð.
Á myndunum, sem voru teknar með stórri aðdráttarlinsu, mátti sjá Thomas máta kjólföt og lesa greinar um brúðkaupið líkt og hann væri að undirbúa sig fyrir stóra daginn. Myndirnar voru svo seldar til slúðurpressunnar líkt og um svokallaðar paparazzi ljósmyndir væri að ræða.
Þá er einnig talað um að tilvonandi tengdapabbi prinsins hafi fengið hjartaáfall fyrir stuttu og sumir vilja meina að það tengist öllum látunum og áreitinu sem hann hefur mátt þola frá breskum fjölmiðlum.
Thomas Markel starfaði árum saman sem ljósamaður í kvikmynda og sjónvarpsbransanum og hefur hann tvisvar sinnum hlotið Emmy verðlaun fyrir störf sín.
Thomas og móðir Meghan, Doria Ragland, skildu hinsvegar þegar Meghan var sex ára. Thomas, sem á tvö börn úr fyrra hjónabandi – til að mynda fyrrnefnda Samönthu – fór fram á gjaldþrot fyrir tveimur árum síðan.
Meghan ku vera miður sín yfir þessu öllu saman en að sögn BBC er hún svokölluð „pabbastelpa“.
