Menningarverðlaun DV voru veitt við hátíðlega athöfn í gær í höfuðstöðvum Frjálsrar fjölmiðlunar við Suðurlandsbraut. Verðlaunin hafa verið veitt árlega frá árinu 1979 fyrir framúrskarandi árangur á menningarsviðinu. Í þetta skiptið voru verðlaunin veitt í sjö flokkum; leiklist, tónlist, kvikmyndum, myndlist, bókmenntum, fræðiritum og stafrænni miðlun auk sérstakra heiðursverðlauna.
Þá voru einnig afhent verðlaun þeim sem fékk flest atkvæði meðal almennings í netkosningu þar sem almenningi gafst kostur á að velja úr hópi allra þeirra sem tilnefndir voru í öllum flokkum.
Í flokknum kvikmyndir fengu Hafsteinn Gunnar Sigurðsson og Huldar Breiðfjörð Menningarverðlaun DV.
Í umsögn dómnefndar sagði:
Undir trénu er ákaflega vel heppnuð kvikmynd sem sækir ekki síst styrk sinn í úthugsað og vel skrifað handrit og einvalalið leikara sem skilar sannfærandi persónum í erfiðum og flóknum aðstæðum í kolsvartri, dramatískri kómedíu.
Steindi jr. sýndi og sannaði að heilmikið er í hann spunnið sem leikara. Þá sýndi Selma Björnsdóttir átakanleg en um leið fyndin og Þorsteinn Bachmann ítrekaði eina ferðina enn að hann er orðinn einn allra besti kvikmyndaleikari landsins. Að öðrum ólöstuðum er þó mestur fengur í ástælustu gamanleikurum síðari tíma, Sigga Sigurjóns og Eddu Björgvins, sem sýndu á sér nýjar hliðar og þá fyrst og fremst Edda sem fór með himinskautum sem einhvers konar nútíma Hallgerður langbrók sem hrindir af stað skelfilegri atburðarás, drifinn áfram af djúpri sorg og nánast skiljanlegum hefndarþorsta.
Undir trénu er öðrum þræði nútíma Njála þar sem smávægilegar nágrannaerjur stigmagnast og enda í mannvígum í skugga inngróinnar hefndarskyldu Íslendingasagnanna.
