Argentínski knattspyrnumaðurinn Gianluca Prestianni hjá Benfica hefur birt stutta yfirlýsingu þar sem hann neitar ásökunum Vinicius Junior um kynþáttaníð og sakar leikmenn Real Madrid um að hafa hótað sér í kjölfar atviks sem átti sér stað í leik liðanna.

Eftir að Vinicius skoraði á 51. mínútu leiksins gekk hann til franska dómarans François Letexier og tilkynnti að Prestianni hefði beint að sér kynþáttafordómum. Í kjölfarið virkjaði Letexier sérstakt and-kynþáttafordómaferli UEFA og var leikurinn stöðvaður í um átta mínútur á meðan málið var skoðað.

Sjónvarpsmyndavélar náðu þó ekki skýrt því sem sagt var á milli leikmannanna, þar sem Prestianni virtist hylja munninn með treyjunni þegar hann talaði til Vinicius. Að lokum var leikurinn hafinn á ný eftir spennuþrungið hlé.

Prestianni fór á Instagram og hafnaði frásögn Brasilíumannsins alfarið. „Ég vil taka skýrt fram að ég lét aldrei kynþáttaníð beinast að Vinicius Junior. Hann misskildi því miður það sem hann taldi sig heyra,“ skrifaði hann og bætti við að hann hefði aldrei sýnt neinum kynþáttafordóma.

Miðjumaðurinn Aurelien Tchouaméni sagði hins vegar eftir leik að Vinicius hefði greint liðsfélögum sínum frá því að hafa verið kallaður „api“.

Þá náðust myndir af Kylian Mbappé kalla Prestianni „rasista“ á vellinum. Mbappé staðfesti síðar að hann teldi sig hafa heyrt Prestianni kalla Vinicius „apa“ oftar en einu sinni og gagnrýndi harðlega slíka hegðun.

Prestianni segist jafnframt hafa fengið hótanir frá leikmönnum Real Madrid eftir atvikið. Benfica hefur birt myndskeið sem félagið telur varpa vafa á frásögn Madrídarmanna og sýni að fjarlægðin á milli leikmanna hafi verið það mikil að erfitt sé að heyra skýrt hvað fór fram.