Arsenal hefur augastað á þremur leikmönnum spænska liðsins Real Sociedad, eftir því sem fram kemur hjá CBS.

Miðjumennirnir Martin Zubimendi og Mikel Merino hafa um nokkurt skeið verið orðaðir við Skytturnar, sem hafa áfram mikinn áhuga á þeim.

Mikel Arteta horfir hins vegar einnig til Ander Barrenetxea. Sá er að upplagi kantmaður.

Bæði Zubimendi og Merino voru í spænska landsliðshópnum sem vann EM í Þýskalandi á dögunum. Skoraði sá síðarnefndi til að mynda sigurmarkið gegn heimamönnum í 8-liða úrslitum.

Arsenal hafnaði í öðru sæti ensku úrvalsdeildarinnar í vor á eftir Manchester City annað árið í röð. Vill Arteta styrkja hóp sinn svo hann verði klár í að fara alla leið.