Veiðisafnið er einstakt á landsvísu en hvergi á Íslandi er hægt að sjá jafn fjölbreytt úrval uppstoppaðra veiðidýra, skotvopna og veiðitengdra muna en hér ásamt því að fræðast um veiðidýr, skotvopn, veiðar og náttúruvernd.

,,Hér eru til sýnis byssur frá Veiðisafninu og skotvopn úr einkasöfnum m.a. annars frá Sverri Scheving Thorsteinssyni, Sigurði Ásgeirssyni, Einari frá Þverá, Sigurfinni Jónssyni, Sigmari Haukssyni og fyrrverandi veiðistjóra Sveini Einarssyni og fjölmörgum öðrum veiðimönnum að ógleymdum Drífu-haglabyssunum frá Jóni Björnssyni heitnum byssusmið frá Dalvík,”  segir Páll Reynisson í samtali  við Veiðipressuna en margir veiðimenn hafa skoðað safnið á Stokkseyri í þau 14 ár sem hefur verið opið.

,,Einnig er hér að finna skotfæraverkstæði þar sem sýnd eru tæki til endurhleðslu skotfæra. Mörg dýr eru uppsett hér í heilu lagi, m.a. strútur og krókódíll og einnig er uppsett ljón og zebrahestar, gíraffi, hreindýr, apar, selir, bjarndýr og sauðnaut eru hér ásamt fjölda annara dýra en uppistaða safnsins eru veiðitengdir munir, skotvopn og uppstoppuð veiðidýr. Jafnframt eru hér til sýnis munir frá Náttúrufræðistofnun Íslands sem Veiðisafnið hefur til sýningar samkvæmt sérstökum samningi,“ segir Páll Reynisson

Alla tíð hefur verið tekið á móti stórum sem litlum hópum, veiðiklúbbum, félögum, fjölskyldum, jafnt og einstaklingum sem eiga leið hjá á auglýstum sýningartíma, eða vilja panta einkaheimsóknir, þar sem safnaleiðsögn er ítarlegri og tímasetningar ákveðnar fyrirfram.

Á heimasíðu safnsins www.veidisafnid.is má einnig finna upplýsingar um Drífuvinafélagið sem stofnað var 12.mars 2005. Veiðisafnið er opið alla dag 11:00 – 18:00  yfir sumartímann og sjón er sögu ríkari.