Elmer Wayne Henley var um tíma talinn hetja eftir að hann skaut raðmorðingjann Dean Corll til bana og bjargaði lífi tveggja unglinga. Henley var aðeins 17 ára þegar hann skaut Corll til bana árið 1973 þar sem hann pyntaði vin og kærustu Henleys og ætlaði sér að myrða þau síðan.
Þegar Henley var tekinn til yfirheyrslu sagði hann að Corll hefði verið raðmorðingi og fórnarlömb hans að minnsta kosti 29 talsins. Mörg þeirra hafði Henley lokkað til sín og sum hafði hann hjálpað til við að pynta og drepa.
Henley berst nú fyrir því að fá reynslulausn eftir 50 ára fangelsisdóm fyrir þátttöku sína í að aðstoða raðmorðingjann, sem varð þekktur sem „Nammimaðurinn“ vegna þess að móðir hans átti sælgætisbúð.
Þann 8. ágúst 1973 var Corll skotinn til bana í heimili sínu í Texas, 33 ára að aldri. Þegar hann lést hafði Corll nauðgað, pyntað og myrt að minnsta kosti 29 fórnarlömb, næstum öll voru unglingsdrengir sem bjuggu í og við Houston eða voru á ferðalagi um svæðið.
Tvö ungmenni voru um það bil að bætast í hópinn þann dag ef ekki væri fyrir Henley, sem skaut Corll til bana þegar hann var að búa sig undir að myrða unglingsdreng og stúlku sem höfðu verið lokkuð að heimilinu nóttina áður.
Hinn 20 ára gamli Timothy Cordell Kerley, bar síðar vitni um að hann væri óendanlega þakklátur Henley fyrir að bjarga lífi hans og 15 ára gömlu Rhondu Louise Williams.
Parið hafði misst meðvitund heima hjá Corll eftir að hafa komið þangað um klukkan þrjú að nóttu. Þegar þau vöknuðu voru þau bundið og kefluð. Corll batt Kerley og Williams við pyntingarbretti sem hann hafði búið til og byrjaði að áreita Kerley kynferðislega á meðan hann skipaði Henley að klippa af föt Williams. Það var ekki fyrr en Williams bað hann um að gera eitthvað að Henley greip byssu Corlls af nærliggjandi borði og byrjaði að skjóta þar til engin skot voru eftir.
Lögreglan kom á vettvang skömmu síðar og þá var Henley tekinn til yfirheyrslu og næstum sleppt lausum eftir að rannsóknarlögreglumenn komust að þeirri niðurstöðu að hann hefði brugðist við í sjálfsvörn og bjargað lífi tveggja mögulegra fórnarlamba.
En þá játaði Henley að hafa verið samsekur Corll, tekið þátt í pyntingum og morðum á fyrri fórnarlömbum og vita hvar líkin höfðu verið grafin.
Henley útskýrði að vinur hans, David Brooks, hefði dregið hann inn í glæpaheim Corlls. Corll hafði verið náinn Brooks frá því að drengurinn var 12 ára gamall og Brooks og hinir drengirnir á svæðinu höfðu dálæti á Corll vegna þess að hann vann í sælgætisbúð móður sinnar.
Henley sagði að hann hefði fyrst rænt hús fyrir Corll, sem borgaði honum fyrir hvert verk.
Henley bar vitni um að Corll bauð honum síðar 200 dali fyrir hvern dreng sem hann gæti komið með, svo unglingurinn fór að koma með kunningja sína á heimilið. Að lokum komst Henley að því að Corll væri að myrða drengina og hann fór fljótlega að taka þátt í dagalöngum pyntingum með raðmorðingjanum sem síðar varð þekktur sem „Nammimaðurinn“.
Henley tók einnig þátt í að farga líkunum og þannig gat hann leitt lögregluna á þrjá staði þar sem Corll hafði grafið mörg fórnarlömb sín.
Á fyrsta staðnum, bátaskýli, fann lögreglan 17 lík. Tvö önnur fundust við nærliggjandi stöðuvatn og sex önnur á strönd. Þar með voru staðfest morð orðin 25, en á næsta áratug fundust fleiri lík á og í kringum Houston-svæðið.
Henley, sem þá var aðeins 17 ára gamall, var ákærður, dæmdur og sakfelldur fyrir morð á sex af fórnarlömbunum sem hann hafði lokkað til Corll. Hann áfrýjaði þeim dómi en var fundinn sekur aftur og síðar dæmdur í lífstíðarfangelsi.
Henley virtist áhugalaus á þeim tíma og sagði í viðtali við Texas Monthly:
„Ég iðrast vegna þess að ég á að gera það. Það er eitthvað sem ég hef reynt að innræta í mér. Ég hef ekki raunverulega tilfinningar gagnvart þessu, veistu. Ég vildi óska að ég hefði ekki gert þetta. Ég er ánægður að ég sagði frá. Ég er ánægður núna að ég er ekki að fela það, bíða, og Dean er ekki þarna úti að drepa lítil börn. En hvað varðar tilfinningar, þá eru engar hjartnæmar tilfinningar.“
Hlutirnir hafa þó breyst, segir Henley, sem er nú 69 ára gamall og berst fyrir reynslulausn eftir að hafa eytt meira en 50 árum í fangelsi.
Fyrstu tilraun hans var hafnað í nóvember síðastliðnum en hann heitir því að reyna aftur.
Talið er að fórnarlömb Corll séu að minnsta kosti 29, þó sumir segi að talan gæti verið yfir 40. Hann var afkastamesti raðmorðingi í sögu Bandaríkjanna þegar hann lést og aðeins þrír aðrir hafa myrt fleiri, einn þeirra var John Wayne Gacy, sem síðar nefndi Corll sem áhrifavald sinn.
