Fyrrverandi raunveruleikastjarnan Tamika Chesser, sem þekkt varð í áströlsku þáttunum Beauty and the Geek Australia, hefur verið ákærð eftir að maki hennar, Julian Story, fannst í íbúð þeirra, sundurlimaður og án höfuðs. Lögreglan hefur svarað að hún sé enn að leita að höfði mannsins.
Samkvæmt yfirlýsingu frá lögreglunni í Suður-Ástralíu hefur Chesser, sem er 34 ára, verið ákærð fyrir morð eftir að Julian Story, 39 ára, fannst í íbúð þeirra í Port Lincoln í Suður-Ástralíu, rétt fyrir klukkan 15:30 að staðartíma fimmtudaginn 19. júní.
Samkvæmt lögreglunni voru yfirvöld fyrst kölluð á staðinn eftir að tilkynning barst um lítinn eld.
„Þetta var átakanlegur vettvangur fyrir lögreglu og viðbragðsaðila þar sem lík Julian hafði verið sundurlimað,“ skrifaði lögreglan. „Höfuð Julian hafði verið fjarlægt við sundurlimunina og þrátt fyrir ítarlega leit hefur það ekki enn fundist.“
Lögreglan telur að Story hafi verið myrtur um miðnætti þriðjudaginn 17. júní. Í skjölum sem lögð voru fyrir dóm kemur fram að þegar lögreglumenn komu á vettvang fundu þeir „leifar hins látna sem voru alvarlega brunnnar og afmyndaðar“.
Vitni sagði lögreglu að „hann hefði séð reyk koma frá íbúðinni, hann hefði séð ákærðu og spurt hvað hún væri að gera, ákærða sagði „ekkert“ og fór síðan með hundana sína í göngutúr og læsti útidyrunum,“ segir í skjölunum.
„Vitnið var áhyggjufullt um að reykur eða eldur myndi breiðast út þannig að hann fyllti fötu af vatni og fór inn í íbúð 3 um bakdyrnar,“ segir í skjölunum. „Á baðherbergi íbúðarinnar fann hann nokkrar tuskur og rusl sem var að brenna.Vitnið hellti úr vatnsfötunni yfir brunahrúguna og endurtók síðan með annarri fötu af vatni.“
Þegar lögreglan kom á vettvang „sat ákærða í garðstól í bakgarðinum við hliðina á íbúð 3 í viðbragðslausu ástandi,“ segir í skjölunum.
Lögreglan hefur birt upptökur úr eftirlitsmyndavélum af Chesser sem sýna hvernig hún var klædd um það leyti sem Story lést og biður lögreglan nú almenning um aðstoð við að rekja ferðir Chesser nóttina sem morðið átti sér stað með því að skoða öryggismyndbönd á heimilum sínum.
Föstudaginn 27. júní sagði rannsóknarlögreglustjórinn Darren Fielke við blaðamenn að Chesser notist ekki við bifreið og að hann vonaðist til að almenningur gæti hjálpað til við að rekja ferðir hennar.
Fielke bætti við að engin ástæða væri þekkt að svo stöddu fyrir morðinu og að Chesser hefði verið handtekin án mótþróa.
„Við vitum að þau voru í sambandi saman það er eitthvað sem verið er að rannsaka, þetta heimilissamband,“ sagði hann.
Samkvæmt ABC fréttamiðlinum mætti Chesser fyrir dóm 27. júní í gegnum fjarfundabúnað frá geðheilbrigðisstofnun þar sem hún er í haldi samkvæmt gæsluvarðhaldsúrskurði. Henni var synjað um tryggingu af dómstóli og á næst að mæta fyrir dóm í desember.
Chesser lék árið 2010 í áströlsku sjónvarpsþáttunum Beauty and the Geek, raunveruleikaþáttum þar sem aðlaðandi konur eru paraðar við gáfaða menn til að klára ýmsar áskoranir allt með því markmiði að vinna peningaverðlaun. Chesser lenti í öðru sæti í sinni þáttaröð af raunveruleikaþáttunum og hefur einnig starfað sem fyrirsæta, þar sem hún birtist í tímaritum eins og Playboy, Ralph og FHM.
Rannsóknarlögreglumaðurinn Fielke sagði blaðamönnum að það mikilvægasta í rannsókninni á þessum tímapunkti væri að finna höfuð Story.
„Að endurheimta höfuð Julian til að skila því til fjölskyldu hans svo þau geti fengið lúkningu í málinu, haldið jarðarför og lagt hann til hvíldar, er mjög mikilvægur þáttur fyrir okkur,“ sagði Fielke.
„Við erum að ganga í gegnum ólýsanlegan missi og umönnun ykkar hefur veitt huggun í allri ringulreiðinni,“ sagði fjölskylda Story við í yfirlýsingu. „Við erum einnig innilega þakklát fjölskyldu okkar og vinum og þessu einstaka samfélagi sem hefur hjálpað okkur að komast í gegnum þetta.“
