Kyle Langford er repúblikani og vill verða næsti ríkisstjóri Kaliforníu. Hann vakti gífurlega athygli í vikunni þegar hann kom með umdeilda uppástungu til að hjálpa kvenkyns innflytjendum, sem komið hafa ólöglega inn í Bandaríkin, að komast hjá brottvísun. Ummælin féllu í þættinum The Lilly Show.
„Við vitum hvar þið eruð. Ef þið giftist einum af kynsveltu körlunum okkar í Kaliforníu, þá megið þið vera hér áfram. Ef þið gerið það ekki, þá munum við senda ykkur til baka.“
Miðillinn Newsweek hafði í kjölfarið samband við Langford og bað hann að skýra þessi ummæli sín nánar. Langford sagði:
„Þetta er stefna sem mun hvetja til fjölskyldumyndunar í Kaliforníu en að ala önn fyrir heilbrigðum, stöðugum og ungum fjölskyldum er áherslumál mitt númer eitt.“
Langford segist hlynntur því að brottvísa öllum karlmönnum sem ekki hafa dvalarleyfi í Kaliforníu, en hann vill gefa konunum annað val. Þær eigi að hafa eitt ár til að finna sér bandarískan eiginmann og takist þeim það muni þær fá dvalarleyfi.
„Það eru svo margir búnir að leggja til að ég íhugi þennan möguleika. Ég legg til að við gefum þeim eitt ár.“
