Drengurinn, Tristian James Frahn, lést eftir að hafa orðið fyrir biti frá einum eitraðasta snáki heims sem heitir á máli heimamanna Australian Brown Snake.
Rannsóknin leiddi í ljós að faðir Tristians og tveir aðrir fullorðnir misskildu einkenni bitsins og töldu að drengurinn hefði drukkið áfengi og væri drukkinn.
Þeir ákváðu því að senda hann í rúmið til að „sofa úr sér“ veikindin í stað þess að leita hjálpar. Morguninn eftir fannst drengurinn látinn í garðinum við heimili fjölskyldunnar.
Atvikið átti sér stað í nóvember 2021 en daginn áður hafði Tristian dottið af lítilli garðsláttuvél og kvartað í kjölfarið undan kviðverkjum, uppköstum og þreytu.
Í frétt People kemur fram að þrátt fyrir að einhver hafi bent á að mögulega hefði drengurinn verið bitinn fundust engin augljós ummerki um bit. Hélt faðirinn því fram að drengurinn hefði laumast afsíðis til að drekka áfengi og hann væri að öllum líkindum drukkinn.
Eiturefnaprófanir leiddu í ljós að ekkert áfengi var í líkama drengsins og taldi dánardómstjórinn, Ainslie Kirkegaard, að eitur brúna snáksins hefði valdið mikilli innvortis blæðingu.
Hann hefði að líkindum lifað af ef hann hefði gengið viðeigandi læknismeðferð þar sem heilbrigðisstarfsfólk hefði að líkindum framkvæmt rétta greiningu.
Við krufningu fundust tvö merki á ökkla drengsins sem komu heim og saman við snákabit.
