En á bak við þetta allt var ekkert nema loftið eitt og á endanum komst upp um Gignac sem er frá Kólumbíu. Það var ást hans á beikoni sem varð honum að falli en eins og flestir vita væntanlega borða sádiarabískir prinsar ekki beikon eða aðrar svínaafurðir.
Á Instagram var Gignac iðinn við að birta myndir af lúxuslífi sínu, Rolexúrum og demantskreyttum armböndum. Þá birti hann oft myndir af sér undir stýri á dýrum bílum á borð við Bentley, Rolls Royce og Maserati eftir því sem segir í umfjöllun Daily Mail. Uppáhaldsbíllinn var þó rauður Ferrari.
Gignac flaug með einkaflugvélum, ferðaðist um með ferðatöskur fullar af reiðufé og átti þakíbúð á Fisher Island á Miami en það er eitt dýrasta íbúðahverfið þar.
Hann fjármagnaði þetta allt með svikum en allt tók þetta enda í árslok 2017 þegar hann var handtekinn með fölsuð skilríki.
Hann var dæmdur í 18 og hálfs árs fangelsi fyrir að hafa svikið út átta milljónir dollara frá 26 fjárfestum víða um heim á árunum 2015 til 2017 segir Miami Herald.
Gignac fæddist í Kólumbíu og hét þá Anthony Moreno. Hann ólst upp á götum Bogota fyrstu æviárin en var ættleiddur af fjölskyldu í Michigan í Bandaríkjunum þegar hann var fimm ára. Verjandi hans hélt því fram fyrir dómi að erfið æska hafi ýtt Gignac út í svikastarfsemina.
Stærsta hluta lífs síns lést Gignac vera Khalid bin al-Saud, sem er til í raun og veru, til að komast áfram og hafa í sig og á. Á þeim 30 árum, sem hann stundaði þetta, var hann handtekinn 11 sinnum í ýmsum ríkjum Bandaríkjanna og fékk nokkra fangelsisdóma. Meðal þeirra fjársvika, sem hann kom að, var að þykjast ætla að fjárfesta í lyfjaframleiðslu á Írlandi og spilavíti á Möltu. Hann notaði fölsuð skráningarmerki, skráningarmerki sem stjórnarerinddrekar nota, á bíla sína til heilla fórnarlömb sín.
En það var ást hans á beikoni sem varð honum að falli árið 2017. Þá sagðist hann ætla að fjárfesta fyrir mörg hundruð milljónir dollara í hóteli á Miami. Jeffrey Soffer, sem átti hótelið, hafði áhuga á viðskiptum við hann og hittust þeir margoft til að ræða málin. En það voru matarvenjur Gignac sem vöktu mesta athygli Soffer að sögn Miami Herald. Gignac hámaði nefnilega yfirleitt í sig beikon og aðrar svínaafurðir þegar þeir snæddu saman en það myndi konungborinn sádiarabískur prins aldrei gera. Þetta varð til þess að Soffer gerði alríkislögreglunni FBI viðvart og rannsókn hófst.
