Bandaríski kardínálinn Robert Prevost hefur verið kjörinn páfi, en þetta er í fyrsta sinn sem páfinn kemur frá Bandaríkjunum.

Prevost kemur frá Chicago og starfaði í mörg ár sem trúboði í Perú áður en hann varð erkibiskup þar í landi. Hann hefur valið sér nafnið Leó fjórtándi, eða Leó XIV. Hann þykir nokkuð ungur að árum miðað við forvera sína en hann er aðeins 69 ára gamall.

Prevost er talinn frjálslyndur miðjumaður. Hann hefur einkum beitt sér gegn fátækt og er talið að hann muni nálgast embætti sitt með svipuðum hætti og forveri hans, Frans  páfi.

Hann gerðist prestur eftir að hann hafði lokið bakkalárgráðu í stærðfræði árið 1977 og svo flutti hann til Perú á 9. áratug síðustu aldar og er hann í dag með tvöfaldan ríkisborgararétt, bandarískan og perúskan.

Donald Trump Bandaríkjaforseti segir það heiður að Vatíkanið hafi nú kosið fyrsta bandaríska páfann. „En spennandi, þvílíkur heiður fyrir þjóð okkar. Ég hlakka til að hitta Leó XIV páfa. Það verður magnþrungin stund,“ skrifar forsetinn á Truth Social.

Að sögn BBC fannst kardinálunum í Páfagarði að nýr páfi þyrfti að vera maður sem gæti haldið áfram með góð verk forvera síns og einhver sem gæti verið brú á milli ólíkra skoðana og heima.