Á miðvikudag í síðustu viku var 3.000 blaðsíðna skýrsla, sem vegur ein 14 kg og kostaði sem nemur 14 milljörðum íslenskra króna að gera, gerð opinber á Nýja-Sjálandi. Skýrslan fjallar um mál sem fjöldi fólks hefur reynt að vekja athygli á síðustu fimm áratugi.

Málið snýst um ofbeldi sem mörg hundruð þúsund börn voru beitt þegar þau voru í umsjá hins opinbera, á barnaheimilum og fósturheimilum. Flest fórnarlambanna eru af ættum Maóra sem eru frumbyggjar landsins.

„Ég get ekki fjarlægt sársauka ykkar en ég get sagt þetta við ykkur: Í dag er hlustað á ykkur og ykkur er trúað,“ sagði Christopher Luxon, forsætisráðherra, á fréttamannafundi þegar skýrslan var kynnt. Þessi ummæli hans má rekja til þess að margir trúðu ekki frásögnum fólksins.

Skýrslan var sex ár í vinnslu og rannsóknarnefndin ræddi við rúmlega 2.300 manns og las yfir milljón skjöl.

Carol Shaw, formaður nefndarinnar, sagði í tilkynningu að niðurstaða rannsóknarinnar sé „óhugsandi hörmungar“.

Á síðustu 70 árum voru 200.000 börn, ungmenni og fullorðnir, í viðkvæmri stöðu, beittir margvíslegu ofbeldi á meðan þeir voru í umsjá hins opinbera. Margir voru teknir frá fjölskyldum sínum og komið fyrir á barnaheimilum, sem voru rekin af kirkjunni, eða hjá barnaverndaryfirvöldum. Kynferðislegt ofbeldi, rafstuð, vannæring, nauðganir, nauðungarvinna, ófrjósemisaðgerðir, tilraunir, barsmíðar og andlegt ofbeldi var það sem fólkið þurfti að þola að því er segir í skýrslunni.

Það voru trúarleiðtogar, umönnunaraðilar, félagsráðgjafar og heilbrigðisstarfsfólk sem var meðal þeirra sem beitti ofbeldinu. Forsætisráðherrann sagði að það sem börnin þurftu að ganga í gegnum í Lake Alice hafi verið „hreinar pyntingar“.

„Fyrir suma var þetta eins og heil ævi, fyrir aðra var þetta leiðin að ómerktri gröf. Sumir tóku eigið líf eða létust af völdum þess sem þeir þurftu að þola,“ segir í skýrslunni. Í henni kemur fram að sannanir séu fyrir því að fólk hafi verið sett í ómerktar grafir við geðsjúkrahús.