Nú er komið í ljós að morðinginn á þeim tíma var 16 ára menntaskólanemi, Robert Plympton, og hefur hann nú verið sakfelldur fyrir morð. Robert, sem í dag er sextugur, mun væntanlega eyða restinni af ævi sinni í fangelsi.
Það var árið 2021 að nafn Roberts kom fyrst upp í tengslum við málum. Lífsýni sem tekið var úr leggöngum Barböru var sent í rannsókn og fékk lögregla DNA-snið sem hún gat unnið sig út frá. Með ítarlegri rannsókn tókst að þrengja hringinn utan um Robert og fór lögregla að fylgjast með honum þar sem hann var búsettur í Troutdale, úthverfi Portland.
Dag einn gerði Robert þau mistök að henda frá sér tyggjói. Lögreglumenn brugðust skjótt við, náðu í tyggjóið og sendu það í DNA-rannsókn. Kom erfðaefnið heim og saman við erfðaefnið sem fannst í líkama Barböru. Robert var handtekinn sumarið 2021.
Í frétt AP kemur fram að ekkert bendi til þess að Robert hafi þekkt Barböru þegar hann réðst á hana. Hún var á leið í kennslustund í kvöldskóla skólans þegar ráðist var á hana. Endanlegur dómur verður kveðinn upp í málinu þann 21. Júní næstkomandi og sem fyrr segir má Robert eiga von á því að fá lífstíðardóm.