Spurningin er því hvernig sjávarspendýr ná að sofa án þess að stofna sér í hættu? Live Science segir að ein aðferð, sem þau geta notað, sé að slökkva á helmingi heilans í einu. Þessa aðferð nota höfrungar til dæmis til að geta hvílt sig. Með þessari aðferð geta dýrin lágmarkað líkamsstarfsemi sína og látið helming heilans sofa.
Rannsóknir á höfrungum hafa sýnt að á meðan annar helmingur heilans sefur djúpum svefni, þá er hinn helmingurinn vel vakandi og gerir dýrunum þannig í raun kleift að sofa með annað augað opið.
Auk sjávarspendýra þá nota margar fuglategundir sömu aðferð til að hvíla sig á flugi. Ef fuglar eru í hópflugi þá eru margir þeirra sem eru yst í hópnum með það auga opið sem vísar frá flokknum. Þetta gera þeir til að fylgjast með ránfuglum. Hjá höfrungum er þessu öfugt farið, því þeir hafa það auga opið sem snýr að restinni af hópnum, líklega til að koma í veg fyrir að þeir verði viðskila við hópinn.
Sumar hvalategundir geta ekki notað þessa aðferð og hvíla þess í stað allan heilann í einu eins og við mennirnir gerum. En það er erfitt að rannsaka þetta því eins og gefur að skilja er ekki auðvelt að gera slíkar rannsóknir á hvölum á hafi úti. Verða vísindamenn því að byggja niðurstöður sínar á skráningum á hegðun dýranna.
