Sænskir fjölmiðlar greindu frá því fyrr í dag að barn sé í lífshættu á sjúkrahúsi eftir slys á leikvelli í leikskóla í borginni Umeå í norðurhluta landsins. Þagnarmúr ríkir hins vegar um slysið og ekki er því ljóst á þessari stundu hvernig það bar að.

Aldur barnsins er ekki tilgreindur nákvæmlega en það er sagt vera undir 7 ára aldri. Sænska skólakerfið er nánast eins uppbyggt og það íslenska en börn eru í leikskóla (s. förskola) fram til sex ára aldurs þegar við tekur 10 ára grunnskólanám.

Slysið varð síðastliðinn fimmtudag en fram kemur í frétt SVT að tilkynnt hafi verið fyrr í dag að barnið sé í lífshættu og sé þess vegna á gjörgæsludeild.

Slysið er til rannsóknar hjá lögreglu. Það virðist hafa átt sér stað á opnunartíma leiksskólans en önnur börn voru á svæðinu, auk starfsfólks og foreldra.

Skólastjóri leiksskólans segir að hratt hafi verið brugðist við. Viðbragðsaðilar hafi komið fljótt á vettvang og öðrum börnum, foreldrum og starfsfólki hafi verið boðið upp á áfallahjálp og samverustund fyrir þau sem vildu.

Leikskólastarfið var óbreytt á föstudaginn en skólastjórinn segir andrúmsloftið hafa verið þungt.

Leikskólinn og lögreglan halda því leyndu hvernig slysið bar að. Það er því ekki ljóst hvort eitthvað annað barn en hið slasaða hafi komið við sögu en enginn einstaklingur er sagður liggja undir grun um að hafa slasað barnið. Lögreglurannsóknin stendur yfir og rætt hefur verið við vitni.