Það er óhætt að segja að draumabrúðkaup Liang Le Wong, 32 ára frá Singapúr, hafi ekki verið hefðbundið. Wong skiptist á heitum við sinn heittelskaða, Xie Peng, 40 ára, þann 26. nóvember, og hún vissi sko alveg hvernig hún vildi hafa hlutina.
Wong deildi myndum frá brúðkaupinu á Facebook. Á myndum má sjá brúðhjónin stilla sér upp fyrir framan stóran Zinger hamborgarabaunastól og Wong halda á kjúklingavendinum sínum. Boðið var upp á hefðbundnar veitingar að hætti KFC, en staðurinn gaf brúðhjónunum veitingar að andvirði 2300 dala. Einnig var boðið upp á kínverskt hlaðborð.
„Ég átti draumabrúðkaup með KFC-þema!!! Virkilega flott að hafa KFC em hluta af sérstökum degi mínum sem gerir þetta að einstökum og eftirminnilegum degi,“ skrifaði Wong.
Fyrir utan að vera mikill aðdáandi KFC þá er ástæðan fyrir staðsetningu brúðkaupsins einföld, hjónin áttu sitt fyrsta stefnumót nefnilega á KFC eftir að hafa kynnst á stefnumótaappi fyrr á árinu.
