Í kjölfar þess að nokkrir veiktust nýlega eftir að hafa borðað súkkulaði, sem var keypt á markaði í Nottinghamskíri á Englandi, lét lögreglan gera efnafræðirannsókn á súkkulaðinu. Rannsóknin leiddi í ljós að í því voru ofskynjunarefnin psilocin og THC, sem er að finna í kannabis.

Sky News skýrir frá þessu og segir að samkvæmt tilkynningu frá lögreglunni hafi ofskynjunarefnin fundist í nokkrum súkkulaðistykkjum sem voru seld í bás á markaði í Mansfield.

Lögreglan vinnur nú að rannsókn málsins og hefur sent út aðvörun þar sem fólk er hvatt til að borða ekki súkkulaði keypt á markaðnum.

63 ára kona var handtekin í síðustu viku, grunuð um að hafa sett ofskynjunarefnin í súkkulaðið. Henni var síðan sleppt lausri gegn greiðslu tryggingar.

Fólkið, sem veiktist af súkkulaðiátinu, hefur nú náð sér að fullu.