Borgarstyrjöld gæti brotist út í Rússlandi þar sem kjarnorkuvopnum yrði hótað og mögulega beitt, landið gæti brotnað upp í minni ríki og Vladimir Pútín, Rússlandsforseti, yrði drepinn. Þetta er spádómur sem Paul A. Goble, fyrrum sérfræðingur í málefnum Rússlands hjá CIA, varpaði fram í umfjöllun The Sun í dag.
Rúmir fjórtán mánuðir eru liðnir síðan Rússar réðust inn í Úkraínu. Pútín bjóst við skjótum sigri en raunin hefur orðið önnur og hetjuleg barátta Úkraínumanna hefur gert það að verkum að stríðið er orðið hin mesta sneypuför fyrir Rússlandsforseta. Næstum 200 þúsund rússneskir hermenn og málaliðar hafa fallið í valinn og andvirði þess búnaðar sem hefur tapast hleypur á hundruðum milljarða. Hátt hlutall fulltrúa smærri þjóðarbrota meðal hinna föllnu í Úkraínu sé byrjað að skapa megna óánægju innan Rússlands og telja margir að Pútín muni ekki haldast í valdastóli lengi.
Í þeim hópi er Paul A. Goble, fyrrum sérfræðingur í málefnum Rússlands hjá CIA. Hann telur að Rússland gæti brotnað upp í smærri ríki á næstunni og að sú atburðarás verði blóðug. Það sem hann óttast mest er að mörg þessara ríkja muni komast yfir kjarnorkuvopn sem gæti skapað stórhættulegt ástand.
Þá segir hann að sá sem munu bera ábyrgð á falli Rússland verði Vladimir Pútín. Hann hafi stjórnað landinu með þeim hætti að það sé orðið afar óstöðugt og lítið þurfi til svo að allt hrynji til grunna.
Telur Goble að ýmsir stríðsherrar muni taka stjórnina í hinum ýmsu landshlutum og að mikill glundroði muni eiga sér stað þar til jafnvægi kemst á.„Rússland er ótrúlega flókið og margbrotið land og ég býst við því að fall þess muni endurspegla það,“ segir Goble.
Hann segir ómögulegt að segja til um upp í hversu mörg ríki Rússland gæti brotnað, þau gætu verið örfá og allt upp í hundrað.
