Jacob, sem er 33 ára og af dönskum og palestínskum ættum, var fundinn sekur um að hafa gengið til liðs við hryðjuverkasamtökin sem kenna sig við Íslamska ríkið og fyrir að hafa barist með samtökunum þegar Danmörk og önnur vestræn ríki börðust við samtökin í Írak og Sýrlandi.
Allt að 16 ára fangelsi liggur við brotum gegn grein 101a en dómarinn mat það Jacob til refsilækkunar að hann viðurkenndi brot sín og var samstarfsfús við rannsókn málsins. Hann játaði allar sakargiftir fyrir dómi.
Hann sagðist hafa fæðst í Líbanon en hafi alist upp í Kaupmannahöfn og hafi skólagangan reynst honum erfið. Þegar hann var um tvítugt hafi hann leiðst út í afbrot. Honum fannst lífið vera tilgangslaus og hélt því til Sýrlands 2013 því hann vildi gera gagn. Hann sagðist ekki hafa verið mjög trúaður og hafi sjaldan farið í mosku.
Í fyrstu fékk hann hernaðarþjálfun hjá einum hópi al-Kaída og síðan hélt hann til borgarinnar Raqqa sem var höfuðstaður Íslamska ríkisins.
Hann sagðist hafa orðið vitni að grimmd félaga hryðjuverkasamtakanna í borginni. Hann hafi séð marga tekna af lífi og meðal annars séð ungan mann krossfestan fyrir rán.
Dag einn þegar hann var á leið í mat með vini sínum ók hann fram hjá torgi í borginni þar sem mörg lík og afhöggin höfuð voru. Hann stillti sér upp og tók myndir af sér með þeim og birti síðan á Facebook. Fyrir dómi sagðist hann sjá eftir þessu og áttaði sig á að þetta hafi verið „sjúkt“.
Hann barðist með Íslamska ríkinu og lýsti því fyrir dómi hvaða þátt hann tók í bardögum.
Hann kvæntist þrisvar sinnum á meðan á dvöl hans í Sýrlandi stóð og eignaðist fimm börn.
