Hann sagði að COVID-19 valdi enn vandræðum og enn séu mörg verkefni tengd veirunni en faraldrinum sé lokið. „Þið hafið kannski tekið eftir að enginn notar andlitsgrímu. Allir virðast vera í góðu formi svo ég held að þetta sé að breytast,“ sagði Biden.
Dregið hefur úr áhrifum faraldursins samhliða því að Bandaríkjamenn hafa fengið aðgang að betri meðferð og fleiri bóluefnum.
Tölur frá bandarískum heilbrigðisyfirvöldum sýna þó að enn látast mörg hundruð Bandaríkjamenn á degi hverjum af völdum COVID-19.
Áhrifa veirunnar gætir einnig í opinberum fjármálum en Biden hefur beðið þingið um fjárveitingu upp á 22,4 milljarða dollara til að takast á við væntanlega fjölgun smita í haust.
Samkvæmt tölum frá heilbrigðisyfirvöldum smitast tæplega 60.000 manns að meðaltali á sólarhring. Að meðaltali eru 4.317 lagðir inn á sjúkrahús á degi hverjum vegna COVID-19.
