Leiðtogi glæpagengis var skotinn til bana í Haninge í suðurhluta Stokkhólms síðdegis í gær. Maðurinn, sem var 25 ára, var háttsettur meðlimur glæpagengis sem hefur um langa hríð staðið í blóðugum átökum.

Aftonbladet segist hafa heimildir fyrir að maðurinn hafi verið skotinn í höfuðið. Tilkynning um skothríð barst til lögreglunnar klukkan 18.20. Maðurinn fannst utandyra og var strax fluttur á sjúkrahús. Í gærkvöldi var staðfest að hann hefði verið úrskurðaður látinn þegar á sjúkrahúsið var komið.

Nokkrir hafa verið yfirheyrðir vegna málsins en enginn hefur verið handtekinn.

Það sem af er ári hafa 47 verið skotnir til bana í Svíþjóð en allt árið í fyrra féllu 46 fyrir byssukúlum. Flest morðin tengjast átökum glæpagengja. Ekkert Evrópuríki kemst nærri Svíþjóð hvað varðar fjölda morða með skotvopnum.