Salma var við doktorsnám á Englandi þegar hún fór heim í frí. Það sem fór fyrir brjóstið á einræðisstjórninni var að hún hafði endurtíst tístum frá aðilum sem eru yfirlýstir andstæðingar einræðisstjórnarinnar og gagnrýna hana harðlega. Það er konungsfjölskyldan sem stýrir Sádi-Arabíu af mikilli hörku.
The Guardian segir að Salma hafi í upphafi verið dæmd í þriggja ára fangelsi fyrir að hafa notað Twitter til að „valda óróa og raska almannaöryggi og þjóðaröryggi“.
Áfrýjunardómstóll tók mál hennar fyrir á mánudaginn og þyngdi refsinguna í 34 ára fangelsi og 34 ára ferðabann að afplánun lokinni. Talið er að hún geti enn áfrýjað dómnum.
Það er ekkert sem bendir til að Salma sé meðal áhrifamikilla eða sérstaklega háværra andstæðinga stjórnvalda í Sádi-Arabíu. Hún er gift, tveggja barna móðir.
Hún virðist styðja Loujain al-Hathloul sem er þekktur femínisti sem hefur setið í fangelsi fyrir mótmæli sín gegn lögum og reglum og einræðisstjórninni. Hún hefur sætt pyntingum fyrir að styðja kröfu kvenna um að mega aka bíl. Hún má ekki yfirgefa Sádi-Arabíu.
