Þessa dagana stendur umfangsmikil heræfing yfir á og við Taívan þar sem her landsins æfir viðbrögð við árás Kínverja af sjó. Taívanar óttast að Kínverjar muni ráðast á eyjuna og sækja innblástur til innrásar Rússa í Úkraínu.

Taívan, sem er austan við Kína, er sjálfstætt ríki að mati landsmanna og er landið með eiginn gjaldmiðil, dómskerfi og pólitískt kerfi.

Kínverjar líta hins vegar á Taívan sem órjúfanlegan hluta af Kína þrátt fyrir að Taívan hafi verið aðskilið frá Kína stjórnarfarslega síðan 1949 þegar borgarastyrjöldinni í Kína lauk.

Heræfingar Taívana hófust á mánudaginn og lýkur á föstudaginn.

Tsai Ing–wen, forseti Taívan, hefur lofsamað „staðfestu“ taívanska hersins en hún var viðstödd æfingar í gær þar sem skip, flugvélar og flugskeyti komu við sögu. Markmiðið var að takast á við „flota óvinaskipa“.

Kínverjar hafa látið heyra reglulega í sér og hafa gert vart við sig nærri Taívan síðan  Tsai Ing–wen var kjörin forseti. Hún hefur staðið fast á þeirri skoðun sinni að Taívan tilheyri ekki Kína.

William Burns, forstjóri bandarísku leyniþjónustunnar CIA, hefur sagt að Kínverjar séu staðráðnir í að gera árás á Taívan.