Í gær fannst 21 árs sænsk kona, sem hafði verið saknað síðan um miðjan október, látin í skógi nærri Vetlanda í suðurhluta Svíþjóðar. Tvær konur, sem einnig eru 21 árs, hafa verið handteknar vegna málsins. Þær eru grunaðar um að hafa svipt hina látnu frelsi.

Þetta kom fram á fréttamannafundi lögreglunnar í gærkvöldi að sögn sænskra fjölmiðla. Fram kom að hinar handteknu hafi verið úrskurðaðar í gæsluvarðhald og nú sé næsta stig rannsóknarinnar að hefjast, það er að komast til botns í hver atburðarásin var.

Lögreglan sagði að allt frá því að tilkynnt var um hvarf konunnar hafi lögreglan unnið út frá þeirri kenningu að um afbrot væri að ræða, að hún hefði ekki látið sig hverfa af fúsum og frjálsum vilja.

Á fundinum kom fram að lík konunnar hefði fundist síðdegis í gær og að lögreglan hafi haft ástæðu til að leita þar sem það fannst. Nú verður lík hennar krufið til að hægt sé að komast að hvað varð henni að bana.

Konan sást síðast fyrir utan næturklúbbinn Nöjet í Vetlanda aðfaranótt 16. október.

Hin látna og hinar handteknu þekktust.