Sky News skýrir frá þessu. Fram kemur að rúmlega 60 manns hafi slasast þegar Brooks ók Ford bifreið sinni inn í skrúðgönguna. Sex létust, þar á meðal átta ára barn.
Brooks var ákærður fyrir sex morð af yfirlögðu ráði og 70 önnur brot. Hver og ein morðákæra hafði sjálfkrafa ævilangt fangelsi í för með sér. Dómarinn hafði þó heimild til að ákveða að Brooks fengi að afplána hluta af refsingunni undir sérstöku eftirliti, þetta er útgáfa Wisconin af reynslulausn. En dómarinn nýtti ekki þessa lagaheimild og því á Brooks ekki möguleika á reynslulausn.
Dauðarefsing er ekki heimil í Wisconsin.
Fórnarlömb Brooks báru vitni fyrir dómi og báðu þau næstum öll dómarann um að dæma hann til þyngstu mögulegu refsingar. „Það eina sem ég óska er að þú rotnir, rotnir hægt,“ sagði Chris Owens þegar hann bar vitni en móðir hans var meðal fórnarlamba Brooks.
Brooks ók bifreið sinni, Ford Escape, á skrúðgönguna eftir að hann hafði rifist við fyrrum unnustu sína.
Hann bar geðsjúkdómi fyrir sig í fyrstu en dró þá fullyrðingu sína til baka í september. Í október rak hann verjendur sína og annaðist sjálfur vörn sína fyrir dómi. Hann sagði að alvarleg bilun hefði verið í bílnum og að hann hefði ekki ætlað sér að meiða neinn og að hann hefði þeytt flautu bifreiðarinnar til að vara fólk við.
Sérfræðingur sagði hins vegar að ekkert hefði verið að bifreiðinni.
