Þetta var í fyrsta sinn sem tilraun af þessu var gerð en tilgangurinn var að kanna hvort hægt væri að breyta braut loftsteinsins. Nauðsynlegt getur verið að grípa til slíkra aðgerða í framtíðinni ef hættulegur loftsteinn stefnir á jörðina.
Bandaríska geimferðastofnunin NASA birt í gær fyrstu útreikninga sína á áhrifum árekstursins og sýna þeir að það tókst að breyta braut loftsteinsins og það meira en reiknað var með. Bill Nelson, forstjóri NASA, sagði að með þessu hefði NASA sýnt að stofnunin geti af alvöru varið jörðina fyrir loftsteinum.
Dimorphos er á braut um stærri loftstein, Didymos, eru þeir kallaðir tvöfaldur-loftsteinn. Fyrir áreksturinn tók það Dimorphos 11 klukkustundir og 55 mínútur að fara einn hring um Didymos. Nú tekur það 11 klukkustundir og 23 mínútur. Áreksturinn breytti því brautinni um 32 mínútur.
Nelson sagði að talað hafi verið um að ef það tækist að breyta brautinni um 10 mínútur væri það stór áfangi.
Það er ekki að ástæðulausu að NASA eyddi sem svarar til um 50 milljörðum íslenskra króna í verkefnið, sem nefnist DART, því ef loftsteinn á stærð við Dimorphos lendir á jörðinni getur hann eytt stórborg og valdið miklu tjóni. Loftsteinar af þessari stærð skella að meðaltali á jörðinni á 20.000 ára fresti.
Nú þegar er búið að finna um 60% af þeim loftsteinum, sem eru á stærð við Dimorphos, sem eru á braut nærri jörðinni. Búið er að finna rúmlega 90% af stærstu loftsteinunum, sem eru á stærð við þann sem útrýmdi risaeðlunum.
