Ný rannsókn hefur leitt í ljós að refir í norðurhluta Bretlands, í skosku hálöndunum, hafa breytt mataræði sínu að hluta og éta nú töluvert af hitaeiningaríkum hundaskít.
Þetta kemur fram í fréttatilkynningu frá University of Aberdeen að sögn Videnskab.
Fram kemur að rannsóknin hafi beinst að því að rannsaka sambýli skógarmarðar og refa með því að rannsaka mataræði þeirra. Til að gera það var saursýnum frá báðum tegundunum safnað og þau send í DNA-rannsókn.
Þá kom í ljós að tæplega 40% af því DNA sem fannst í refaskítnum var hunda-DNA. Ástæðan er einfaldlega sú að refir éta hundaskít.
Vísindamennirnir segja að hundaskítur sé næstum því jafn hitaeiningaríkur og venjulegt fæði refa. Það sé miklu auðveldara fyrir þá að verða sér úti um hundaskít en einhverja bráð og því éti þeir hann. Einnig er oft lítið um fæðu í Cairngormskfjöllunum, þar sem sýnin voru tekin, en þau eru vinsæll staður til að fara með hunda í göngutúr og því kannski ekki furða að refir éti hundaskít þegar lítið er um fæðu.
Cristian Navarro, meðhöfundur rannsóknarinnar, segir í fréttatilkynningunni að það sé ekki hættulaust fyrir refina að éta hundaskít. Sjúkdómar og sníkjudýr geti borist í þá úr hundum.
Rannsóknin hefur verið birt í vísindaritinu Ecology and Evolution.
