Bandaríski leikarinn Ben Stiller hefur verið í Austur-Evrópu síðustu daga til að vekja athygli á málefnum úkraínskra flóttamanna og hvetja til stuðnings við þá og aðra flóttamenn um allan heim. Hann fór til Kyiv, höfuðborgar Úkraínu, í gær og hitti þar meðal annars Volodymyr Zelenskyy, forseta.

Stiller og Zelenskyy tókust í hendur og Stiller sagði forsetann vera hetjuna sína: „Þetta er mér mikill heiður. Þú ert hetjan mín. Þú áttir ansi góðan leiklistarferil áður.“

Þessu svaraði forsetinn af hógværð og sagði: „Ekki eins glæstan og þú.“

Stiller hrósaði honum síðan enn meira og sagði að það sem hann hefur gert, hvernig hann hafi þjappað úkraínsku þjóðinni saman og fylkt henni að baki sér, sé svo sannarlega aðdáunarvert.

Hann sagði að erfitt væri að átta sig á þeirri miklu eyðileggingu sem hefur orðið í stríðinu nema með því að sjá hana með eigin augum en hann fór meðal annars til Irpin í gær en borgin varð illa úti í árásum Rússa.