Spænska lögreglan handtók nýlega níu manns, sem tengjast þekktum skipulögðum glæpasamtökum, í Marbella. Margir hinna handteknu eru danskir ríkisborgarar að sögn 7 Dias Marbella. Ástæðan fyrir handtökunum er að upp komst um smygl á miklu magni af hassi. Hafði því verið komið fyrir í dósum sem áttu að innihalda niðursoðna tómata.

Samtals var um 780 kíló af hassi að ræða og hafði því verið komið fyrir í 381 dós. Hassið var í plastpokum ofan í dósunum. Senda átti hassið á brettum til Danmerkur.

Lögreglan fann efnin í vöruskemmu. Einnig var leitað á fleiri stöðum og lagði lögreglan hald á 201.000 evrur og háar fjárhæðir í dönskum krónum. Að auki var lagt hald á 25 lúxusbíla með dönsk skráningarnúmer. Verðmæti þeirra er sem nemur rúmlega 150 milljónum íslenskra króna.

Auk danskra ríkisborgara voru rússneskir og íranskir ríkisborgarar handteknir.