IFPMA eru alþjóðleg samtök lyfjaframleiðenda. Eins og staðan er núna er mikill munur á gangi bólusetninga í ríku löndunum og þeim fátæku. Í ríku löndunum hafa tæplega 70% fengið tvo skammta af bóluefnum en í Afríku er hlutfallið aðeins 6%.
Airfinity, sem vinnur að greiningum á ýmsum vísindalegum gögnum, segir að nú séu 1,5 milljarðar skammta af bóluefnum gegn COVID-19 framleiddir í hverjum mánuði.
Thomas Cueni, forstjóri IFPMA, sagði á fréttamannafundi í Genf í síðustu viku að í september verði búið að framleiða 7,5 milljarða skammta og að fyrir árslok verði búið að framleiða 12 milljarða skammta. Þetta þýðir að þrátt fyrir að ríku löndin vilji bólusetja alla 12 ára og eldri verða að minnsta kosti 1,2 milljarðar skammta til ráðstöfunar til fátæku ríkjanna að sögn Airfinity. Cueni sagði að þetta þýði að ríkisstjórnir sem liggi á skömmtum af bóluefnum, vegna ótta um að skortur verði á þeim, þurfi ekki lengur að gera það, nóg verði til.
IFPMA segir að um mitt næsta ár verði búið að framleiða 24 milljarða skammta, miklu meira en þörf er á fyrir heimsbyggðina.
