Björgunarmenn hafa flutt um 2.600 manns frá Costa del Sol á Spáni vegna skógarelda sem herja á svæðinu. Rúmlega 6.000 hektarar skóglendis hafa brunnið á aðeins fjórum dögum. Hermenn voru sendir á vettvang í gær til að aðstoða við slökkvistarfið en eldurinn braust út á miðvikudaginn í Estepona sem er vinsæll ferðamannastaður í fjalllendi.

Eldtungurnar sjást úr margra kílómetra fjarlægð. Íbúar margra bæja hafa verið fluttir á brott og komið fyrir í fjöldahjálparstöðvum. Flestir íbúanna eru eldra fólk en ekki liggur fyrir hvort einhverjir ferðamenn hafi einnig verið fluttir á brott frá hótelum og gistiheimilum.

Eldurinn er sagður mjög öflugur og breiðist hann út í margar áttir og er viðureignin við hann því mjög erfið.