Þyrlan fór í sitt fyrsta flug um miðjan apríl. Í júlí fór hún í sitt flóknasta flug til þessa en þá fór hún upp í 12 metra hæð, sem er mesta hæðin sem hún hefur farið í, og breytti fjórum sinnum um stefnu og tók 10 ljósmyndir í lit.
Út frá þessum myndum unnu verkfræðingar og fleiri hjá NASA þrívíddarmynd af yfirborði plánetunnar. Nokkrar hæðir, sem sjást á myndinni, fönguðu sérstaklega athygli vísindamannanna. „Í þrívídd er næstum eins og maður geti teygt höndina út og snert hæðirnar,“ er haft eftir Kevin Hand, vísindamanni hjá NASA, í fréttatilkynningu frá stofnuninni. Hann sagði einnig að vegna þess að um þrívíddarmynd er að ræða sé hægt að sjá smáatriði sem annars væri erfitt að sjá.
„Við nánari skoðun sér maður undarlegar línur á yfirborði margra steina. Eru það vindur og ryk sem hafa gert þessar línur eða er það hluti af sögunni um að vatn hafi verið á Mars? Það vitum við ekki enn,“ sagði hann.
Perseverance er á ferð um yfirborð Mars og tekur sýni af jarðvegi og steinum. Þessi sýni verða geymd og síðar sótt af geimfari. Ingenuity, sem er aðeins 1,8 kíló, flýgur fram og aftur og tekur myndir af yfirborðinu.
