The Sun segir að Harry hafi orðið mjög reiður þegar Elísabet II svipti hann öllum titlum hans innan hersins en Harry hafði vonast til að geta haldið þeim eftir að þau hjónin sögðu skilið við konungshöllina.
„Harry og Meghan voru brjáluð því samkvæmt „Megxit-samningnum“, sem var nýbúið að skrifa undir, var ljóst að Harry gat ekki haldið titlum sínum innan hersins. Hann varð mjög reiður því þessir titlar skiptu hann miklu máli,“ hefur The Sun eftir heimildarmanni.
Harry er sagður hafa skrifað undir samninginn um viðtalið við Oprah þegar ljóst var að hann myndi missa fyrrnefnda titla. Með viðtalinu fór hann í einhverskonar stríð við konungsfjölskylduna.
Hann var með titilinn Captain General hjá breska flotanum en hann tók við honum af afa sínum, Philip drottningarmanni. Hann var einnig með titilinn Honorary Commodore–in–Chief og Honorary Air Commendant í flughernum. Það að missa þessa titla særði hann mikið, sérstaklega þar sem hann var tvisvar sendur til Afganistan á vegum breska hersins og tók þátt í bardögum við Talibana.
Fram að þessu var talið að viðtalið við Oprah hafi verið hefnd vegna þess að Archie, sonur Harry og Meghan, fær ekki titil sem prins en nú virðist sem þetta hafi snúist meira um titla Harry sjálfs.
The Sun hefur eftir heimildarmönnum, með tengsl við bresku hirðina, að konungsfjölskyldan hafi óttast að Netflix eða önnur bandarísk sjónvarpsfyrirtæki gætu tekið upp á því að nota titla Harry til að kynna og auglýsa sjónvarpsþætti og af þeim sökum hafi hann verið sviptur þeim.
Harry og Meghan hafa skrifað undir samning við Netflix um að framleiða sjónvarpsþætti fyrir streymisveituna en með því tryggja þau sér salt í grautinn nú þegar fjárstreymið frá breskum skattgreiðendum stöðvast. Elísabet II er sjálf sögð hafa komið í veg fyrir að hjónin fengju betri „skilnaðarsamning“ við konungsfjölskylduna.
