Á mánudaginn birti bandaríska Manntalsstofan, U.S. Census Bureau, niðurstöður nýs manntals. Manntalið ræður hvernig þingsætum í fulltrúadeild Bandaríkjaþings er skipt á milli ríkjanna og því höfðu margir beðið spenntir eftir að niðurstöður manntalsins yrðu opinberaðar.

Samkvæmt manntalinu þá verða Texas, Flórída og Norður-Karólína meðal þeirra ríkja sem fá flest þingsæti í fulltrúadeildinni. Þetta getur hugsanlega komið sér vel fyrir Repúblikana og aukið líkurnar á að þeir nái meirihluta í deildinni í kosningunum á næsta ári.

Texas fær tvö þingsæti til viðbótar. Flórída, Norður-Karólína, Colorado, Montana og Oregon fá eitt sæti til viðbótar hvert ríki. Á móti missa New York, Kalifornía, Illinois, Michigan, Ohio, Pennsylvania og Vestur-Virginía eitt sæti hvert ríki.

Kyle Kondi, sérfræðingur í kosningamálum hjá University of Virgina, sagði að miðað við þessa nýju skiptingu vænti hann þess að Repúblikanar bæti við sig nokkrum þingsætum. Þeir þurfa að bæta við sig fimm sætum til að ná meirihlutanum af Demókrötum.

Þingsætum er úthlutað á 10 ára fresti þegar manntal er gert. Einnig er kjörmönnum, sem koma við sögu í forsetakosningunum, úthlutað á grundvelli manntalsins.

Eins og svo oft þegar tölfræði á í hlut þarf ekki að muna miklu til að breytingar verði. Ef New York hefði haft 89 íbúa til viðbótar hefði ríkið ekki misst þingmann en það hefði Minnesota hins vegar gert.

Samkvæmt manntalinu eru íbúar Bandaríkjanna tæplega 331,5 milljónir. Þeim fjölgaði um 7,4% á einum áratug.