Brasilíski faraldsfræðingurinn Fatima Marinho, sem starfar við háskóla í Sao Paolo, segir að það sé ekki rétt að börnum stafi ekki mikil hætta af COVID-19. Hún segir að 2.060 börn, yngri en 9 ára, hafi látist af völdum sjúkdómsins í Brasilíu.

Þetta er mat hennar en opinberar tölur eru mun lægri. Hún segir að ástæðan fyrir því sé að ekki séu alltaf tekin kórónuveirusýni úr börnum. BBC skýrir frá þessu. Samkvæmt opinberum tölum hafa 800 börn, yngri en 9 ára, látist af völdum sjúkdómsins.

Marinho segist telja að meðal látnu barnanna hafi verið 1.302 kornabörn.