Danski þingmaðurinn Naser Khader er nú í veikindaleyfi eftir að alvarlegar ásakanir voru settar fram á hendur honum nýlega. Þá stigu nokkrir aðilar fram í viðtali við Berlingske og skýrðu frá því að Khader hefði haft í hótunum eftir að fólkið gagnrýndi hann. Á laugardaginn bættist enn við þessar upplýsingar þegar Berlingske skýrði frá nokkrum af ummælum Khader.

„Ríddu geit,“ sagði hann við einn gagnrýnanda 2016 en miðað við umfjöllun danskra fjölmiðla hefur Khader greinilega átt erfitt með að þola gagnrýni á störf sín sem þingmaður Íhaldsflokksins (Konservative) og skoðanir sínar. Hann hefur meðal annars sett sig í samband við vinnuveitendur fólks sem vogaði sér að gagnrýna hann.

Berlingske skýrði einnig frá því að Søren Pape Poulsen, formaður Íhaldsflokksins, hafi fengið vitneskju um orðfæri og framkomu Khader í garð gagnrýnenda árið 2016 og hafi þá fengið að vita af fyrrnefndum geitaummælum. Einnig fengu fleiri úr forystu flokksins þá sömu upplýsingar um orðanotkun og hótanir Khader.

Poulsen gagnrýndi Khader í síðustu viku og sagði „óásættanlegt“ að hann hefði sett sig í samband við vinnuveitendur fólks sem gagnrýndi hann.

Khader fór í veikindaleyfi þegar málið kom, segist glíma við mikið álag og þarfnist hvíldar.