Í gær var slakað töluvert á sóttvarnaaðgerðum í Englandi og þá náðist einnig það markmið stjórnvalda að bjóða öllum landsmönnum, eldri en 50 ára, upp á bólusetningu gegn kórónuveirunni. Stefnt hafði verið að því að ná því markmiði fyrir 15. apríl og það tókst því nokkuð örugglega.

Boris Johnson, forsætisráðherra, tilkynnti þetta í gærkvöldi þegar hann sendi frá sér yfirlýsingu. Hann sagði að um mikilvægan áfanga væri að ræða því nú væri búið að bjóða öllum sem eru í þeim níu hópum sem eru taldir í mestri áhættu, hvað varðar smit og veikindi, bólusetningu.

Þetta þýðir að 32 milljónir landsmanna hafa nú fengið að minnsta kosti einn skammt af bóluefni gegn COVID-19 en rúmlega 66 milljónir búa í Bretlandi.

Næstu skref eru að bjóða fólki annan skammt af bóluefni og að bjóða öllum fullorðnum upp á bólusetning fyrir ágúst.

Í gær var slakað töluvert á sóttvarnaaðgerðum og fengu hárgreiðslustofur, barir og veitingastaðir þá leyfi til að opna á nýjan leik. Afléttingin verður í nokkrum skrefum og til að byrja með mega barir og veitingastaðir aðeins taka við gestum á útisvæðum sínum en vonast er til að gestir megi fara inn á staðina þann 17. maí. Leikhús, kvikmyndahús og næturklúbbar fá ekki að opna að sinni.

Skotar, Walesverjar og Norður-Írar sjá sjálfir um sínar sóttvarnaaðgerðir og eru nú einnig farnir að undirbúa tilslakanir.

Smitum og dauðsföllum af völdum COVID-19 hefur fækkað mjög í Bretlandi á undanförnum vikum og má nefna að í gær greindust 3.568 smit en í janúar voru smitin yfir 50.000 á dag. 4,3 milljónir Breta hafa smitast af kórónuveirunni og 127.000 hafa látist.