Frakkar eru nú að herða sóttvarnaaðgerðir vegna kórónuveirufaraldursins. Þeir hafa til dæmis tekið upp kröfu um að fólk verði að vinna heima hjá sér minnst þrjá daga í viku og notkun á andlitsgrímum hefur verið gerð að skyldu víða. Ríkisstjórnin hefur einnig í hyggju að gera að kröfu að fólk framvísi bólusetningarvottorði ef það vill fá aðgang að opinberum stöðum. Þá verður ekki lengur nóg að framvísa neikvæðri niðurstöðu úr sýnatöku.

Jean Castex, forsætisráðherra, tilkynnti þetta á fréttamannafundi á mánudaginn. Þingið verður að samþykkja þetta áður en hægt verður að gera þetta að skyldu. Ef þingið samþykkir frumvarp ríkisstjórnarinnar þá tekur það gildi 15. janúar.

Castex sagði einnig að refsingar verði þyngdar fyrir að falsa bólusetningarvottorð. Nú eru tugir þúsunda falsaðra bólusetningarvottorða í umferð í landinu að hans sögn.

Hann sagði einnig að framvegis verði fólki hugsanlega gert skylt að nota andlitsgrímur utanhúss í borgum og bæjum landsins. Það verði á valdi bæjar- og borgarstjórna að ákveða það. Einnig verður bannað að neyta matar og drykkjar í kvikmyndahúsum og opinberum göngutækjum.

Fjöldi smita er nú í hæstu hæðum í Frakklandi og hafa þau ekki verið fleiri síðan faraldurinn skall á fyrir tæpum tveimur árum.

Ríkisstjórnin ætlar nú að bjóða fólki upp á örvunarskammt af bóluefni gegn veirunni þegar þrír mánuðir eru liðnir frá því að það fékk skammt númer tvö.