Árið 2013 fann fjallgöngumaður kassa á Mont Blanc. Í kassanum voru eðalsteinar að verðmæti um 44 milljóna íslenskra króna. Nú hafa frönsk yfirvöld ákveðið að maðurinn fái að eiga helminginn af þessum eðalsteinum en verðmæti þeirra er sem svarar til 22 milljóna íslenskra króna.

Í umfjöllun CNN um málið kemur fram að maðurinn hafi fundið málmkassa, sem innihélt gimsteina og safíra, þegar hann var að ganga á Mont Blanc 2013. Hann afhenti lögreglunni kassann.

Ekki hefur tekist að finna eiganda hans og eðalsteinanna og nú hefur sú ákvörðun verið tekin að fjallgöngumaðurinn fái helming þeirra í sinn hlut og ríkið hinn helminginn.

Sá helmingur, sem fellur hinu opinbera í hlut, verður til sýnis á Chamonix Crystal safninu.

Talið er að eðalsteinarnir hafi verið um borð í Boeing 707 flugvél frá Air India sem hrapaði á Mont Blanc 1966 en þá létust 117 manns. Vélin var á leið frá Mumbai til New York.