Tveir menn hafa verið úrskurðaðir í gæsluvarðhald af dómstól í Horsens í Danmörku. Þeir eru grunaðir um að hafa kveikt í bólusetningarmiðstöð í Horsens síðasta sunnudagskvöld. Þeir eiga allt að 10 ára fangelsi yfir höfði sér ef þeir verða fundnir sekir um íkveikju.

Annar mannanna er 27 ára og frá Horsens en hinn er 33 ára og frá Brande. Þeir voru handteknir síðdegis á þriðjudaginn.

Þeir eru grunaðir um að hafa klukkan 22.19 á sunnudagskvöldið reynt að kveikja í bólusetningarmiðstöð í Horsens með því að brjóta rúðu og kasta síðan bensínbrúsa, með fimm lítrum af bensíni í, inn og kveikja í bensíninu. Logarnir dóu síðan út af sjálfu sér og ekki varð mikið tjón af.

Við brotum af þessu tagi liggur allt að 10 ára fangelsi og hugsanlega enn þyngri refsing á grundvelli sérstaks ákvæðis hegningarlaganna sem heimilar þyngri refsingu ef brot tengist heimsfaraldri kórónuveirunnar.