Joe Biden, Bandaríkjaforseti, gaf nýlega út fyrirmæli um að 50 milljón olíutunnur yrðu seldar úr varabirgðum Bandaríkjanna. Markmiðið er að reyna að halda aftur af miklum hækkunum á olíuverði um allan heim. Auk Bandaríkjanna hafa önnur stór lönd gripið til sömu aðgerða.
Biden sagði að það muni um þessar 50 milljón tunnur fyrir Bandaríkjamenn sem þurfi að kaupa bensín á bíla sína. Hann sagði að það muni líða einhver tími þar til fólk sér bensínverð lækka en það muni gerast. Á einu ári hefur verð á bensíni hækkað um 50%.
Vinsældir Biden meðal bandarísku þjóðarinnar hafa minnkað síðustu mánuði og þar eiga hækkandi eldsneytisverð og hærri verðbólga hlut að máli auk annarra þátta.
Biden sagði að verð á hráolíu hefði lækkað að undanförnu en ekki væri að sjá að það skilaði sér í verði olíufélaganna til neytenda.
Kína, Indland, Japan, Suður-Kórea og Bretland hafa einnig gripið til þess ráðs að setja hluta af varabirgðum sínum á markað til að sporna við verðhækkunum.
