Baldwin skaut nýlega konu til bana og særði leikstjóra þegar unnið var að upptökum á nýrri kvikmynd. Svo virðist sem um voðaskot hafi verið að ræða þar sem Baldwin vissi ekki að byssan væri hlaðin.
Baldwin hefur lengi verið einarður talsmaður þess að skotvopnalöggjöfin verði hert í Bandaríkjunum og hann hefur einnig brugðið sér í hlutverk Donald Trump eldri í grínþáttunum Saturday Night Live. Hann hefur þótt fara á kostum í hlutverki Trump en það fellur Trumpfeðgunum eflaust ekki vel í geð því þeir virðast ekki þola að grín sé gert að þeim eða þeir gagnrýndir.
Nú býður Donald Trump Jr. stuttermaboli til sölu á heimasíðu sinni. Þeir eru með áletruninni: „GUN‘S DON‘T KILL PEOPLE ALEC BALDWIN KILLS PEOPLE“. Kosta bolirnir 27,99 dollara. The Hill skýrir frá þessu.
Baldwin hefur lengi verið talsmaður hertrar vopnalöggjafar í Bandaríkjunum en það fellur Trumpfeðgunum ekki í geð því þeir sækja mikinn stuðning til skotvopnaeigenda.
All frá því að Baldwin varð konunni að bana hefur Trump Jr. verið iðinn við að hæða hann á Instagram. Í síðustu viku skrifaði hann til dæmis: „Svona lítur það út þegar bjáni, sem er andstæðingur skotvopna, drepur fleiri með einu vopni en allt stóra vopnasafnið þitt hefur drepið.“
Hann hefur einnig svarað þeim fullum hálsi sem hafa gagnrýnt árásir hans á Baldwin og sagt allt þetta heilaga fólk þarna úti geti farið til fjandans. Ef einhver annar hefði orðið konunni að bana hefði Alec Baldwin bókstaflega talað verið sá fyrsti til að míga á gröfina og reyna að draga ályktanir. „Til fjandans með hann,“ skrifaði Trump Jr.
