Nýlegur dómur sem Pushpa Ganediwala, dómari við hæstarétt í Bombay á Indlandi, kvað upp hefur vakið mikla reiði. Samkvæmt dómnum þá er það ekki kynferðisbrot ef káfað er á börnum ef þau eru í fötum.

Samkvæmt frétt CNN þá snerist málið um ákæru á hendur 39 ára karlmanni sem var ákærður fyrir kynferðisbrot gegn 12 ára stúlku. Hann hafði káfað á henni en ekki afklætt hana og því snerti hann húð hennar aldrei. Þetta taldi dómarinn gera að verkum að ekki væri um kynferðisbrot að ræða.

Samkvæmt dómsskjölum þá átti þetta sér stað 2016. Maðurinn fékk stúlkuna með sér inn á heimili sitt undir því yfirskini að hann ætlaði að gefa henni ávöxt. Eftir að inn var komið þreifaði hann á brjóstum hennar og reyndi að klæða hana úr nærfötunum. Undirréttur fann hann sekan um kynferðisbrot og dæmdi hann í þriggja ára fangelsi. Þeim dómi áfrýjaði hann og komst Ganediwala að þeirri niðurstöðu að ekki væri um kynferðisbrot að ræða. Í dómsorði sagði hún að vegna þess hversu þungar refsingar liggi við kynferðisbrotum verði að gera kröfur um enn meiri sannanir í málum af þessu tagi.

Í lögum frá 2012 um kynferðisbrot gegn börnum er ekki kveðið sérstaklega á um að húð fórnarlambsins og gerandans þurfi að snertast til að um brot sé að ræða.

Ganediwala sýknaði manninn af ákæru um kynferðisbrot en sakfelldi hann fyrir áreitni og dæmdi hann í eins árs fangelsi.

Dómurinn hefur vakið mikla reiði mannréttindasamtaka og fleiri enda er hann fordæmisgefandi og verða aðrir dómstólar í landinu að fylgja fordæmi hans. Kynferðislegt ofbeldi er mikið vandamál á Indlandi og eru afbrotin oft hrottaleg. Samkvæmt opinberum tölum frá 2018 er nauðgun á konum kærð á 16 mínútna fresti. Þá eru ótaldar allar nauðganirnar sem ekki er tilkynnt um eða eru kærðar.