Lloyd Austin, fyrrum hershöfðingi, verður væntanlega varnarmálaráðherra í ríkisstjórn Joe Biden sem tekur við forsetaembættinu í Bandaríkjunum í dag. Öldungadeild þingsins á þó enn eftir að samþykkja tilnefningar Biden í ráðherraembætti. Austin óttast að í her landsins séu öfgamenn sem séu í raun óvinir Bandaríkjanna. Hann vill því vinna að því að losa herinn við „kynþáttahatara og öfgasinna“.

„Ef tilnefning mín verður samþykkt mun ég berjast fyrir að stöðva kynferðisbrot og að kynþáttahatarar og öfgasinnar verðir fjarlægðir úr okkar röðum,“ sagði hann við yfirheyrslu hjá hermálanefnd öldungadeildarinnar í gær.

Hann sagðist einnig vilja skapa umhverfi þar sem allir, sem eru hæfir og áhugasamir geti þjónað landinu með sóma.

Ef öldungadeildin samþykkir tilnefningu hans verður hann fyrsti svarti varnarmálaráðherrann. Hann hefur heitið því að auka fjölbreytnina innan hersins en þar eru hvítir í miklum meirihluta í æðstu stöðum en þegar neðar dregur í goggunarröðinni er skiptingin jafnari á milli kynþátta.

Gögn frá varnarmálaráðuneytinu sýna að margir úr minnihlutahópum upplifa áreiti innan hersins vegna kynþáttar þeirra.

Árás stuðningsmanna Donald Trump á þinghúsið þann 6. janúar hefur einnig beint sjónum að öfgahægrimönnum og veru þeirra í hernum. „Verkefni hersins er að vernda Bandaríkin gegn óvinum okkar. En það getum við ekki gert ef sumir af þessum óvinum eru í okkar eigin röðum,“ sagði Austin við þingnefndina.