Það er ekki glæsileg framtíðarsýn sem kemur fram í nýrri skýrslu frá Sameinuðu þjóðunum. Í skýrslunni, sem var gefin út á föstudaginn, kemur fram að það stefnir í að hækkun meðalhita á jörðinni verði orðin 2,7 stig árið 2030 og er þá miðað við meðalhitastigið fyrir iðnvæðinguna.

Þetta er mikil hækkun en samkvæmt Parísarsáttmálanum var stefnt að því meðalhitinn myndi ekki hækka um meira en 2 stig.

Svona mikil hækkun mun hafa fleiri gróðurelda í för með sér, flóð og skýstrokka. Þetta mun einnig hafa gríðarlega alvarlegar afleiðingar fyrir dýra- og plöntulíf. Fjöldi tegunda mun deyja út og náttúruhamfarir munu færast í aukana. Allt þetta mun gera okkur mönnunum erfiðara fyrir að lifa hér á jörðinni. Segja skýrsluhöfundar að það sé því nauðsynlegt að grípa til aðgerða og það strax.

„Niðurstaða skýrslunnar er skýr: Með metnaðarfullum loftslagsaðgerðum getum við forðast verstu afleiðingar loftslagsbreytinganna en aðeins ef öll ríki heimsins standa saman,“ hefur CNN eftir Alok Sharma, formanni COP26, sem er loftslagsráðstefna SÞ sem fer fram síðar á árinu.

Í skýrslunni kemur fram að margir vísindamenn telja nauðsynlegt að draga úr losun gróðurhúsalofttegunda um 45% fyrir 2030. Það myndi halda hlýnuninni undir 1,5 stigum en hún er nú orðin 1,2 stig.

Ef losun gróðurhúsalofttegunda heldur áfram eins og nú er þýðir það að hún mun aukast um 16% miðað við losunina 2010. Það mun hafa í för með sér að hækkun meðalhita verður orðin 2,7 stig árið 2030.