Neytendur mega reikna með að þurfa að punga meira út fyrir pasta á næstu mánuðum vegna skorts á aðalhráefninu en það er harðhveiti (durum). Ástæðan er miklir hitar og þurrkar þeim samfara. Verðið á harðhveiti hefur hækkað um tæplega 90% í kjölfar mikils hita og þurrka í Kanada sem er eitt stærsta framleiðsluland harðhveitis.

Á Ítalíu eiga framleiðendur í erfiðleikum með að verða sér úti um nægilegt magn af harðhveiti og segja sérfræðingar að verð á spagettí geti hækkað um allt að 50% vegna þess. The Guardian skýrir frá.

Haft er eftir Jason Bull, forstjóra Eurostar Commodities sem flytur inn rúmlega 10.000 tonn af hráefnum til matvælagerðar til Bretlands árlega, að hið háa verð á harðhveiti geta að lokum leitt til þess að skortur verði á pasta á markaðnum.

Verð á kanadísku harðhveiti hækkaði um 88% frá því í júní fram í september. Á sama tíma hækkaði verðið á ítölsku harðhveiti um 57%.