„Ég legg til nýtt verkefni. Viðbragðsstofnun á sviði heilbrigðismála fyrir ESB. Fjárfesta á fyrir 50 milljarða evra í henni fyrir 2027. Við vinnum að stofnun evrópsks heilbrigðisbandalags, einnig í þágu heimsbyggðarinnar allrar. Við höfum sýnt að þegar við vinnum saman erum við best,“ sagði hún.
Hún sagði að þessi viðbragðsstofnun eigi að tryggja að þegar sjúkdómar koma fram á sjónarsviðið verði þeir ekki að alþjóðlegu vandamáli eins og kórónuveiran er.
Viðbragðsstofnunin mun heita HERA og á hún að styrkja getu ESB til að uppgötva, koma í veg fyrir og bregðast hratt við þegar neyðarástand kemur upp hvað varðar heilbrigðismál og mun stofnunin starfa þvert á landamæri. Hera mun einnig þróa, framleiða og deila út bóluefnum og öðru sem þörf er á í baráttu við sjúkdóma.
Bandaríkin eru með svipaða stofnun sem gerði að verkum að þau voru fljótari að komast úr rásblokkunum á bóluefnasviðinu en ESB þegar kórónuveiran breiddist út um heimsbyggðina.
Hjá ESB standa vonir til að HERA verði orðin starfhæf strax í byrjun næsta árs.
Fram að þessu hefur ESB ekki blandað sér mikið í heilbrigðismál og hefur látið aðildarríkjunum eftir að sjá um sín heilbrigðismál en heimsfaraldurinn hefur sannfært leiðtoga sambandsins um að þörf sé á meiri samvinnu á þessu sviði.
