Samkvæmt nýrri samantekt bandarísku alríkislögreglunnar FBI þá voru 7.759 hatursglæpir skráðir í Bandaríkjunum á síðasta ári og voru þeir 6% fleiri en árið á undan. Mesta aukningin var í árásum á svart fólk og fólk af asískum uppruna. Fjöldi hatursglæpa hefur ekki verið meiri í 12 ár að því er segir í skýrslunni.

Skýrslan byggist á tölum frá rúmlega 15.000 lögregluembættum og löggæslustofnunum. Frá 2014 hefur hatursglæpum fjölgað um 42%.

Árásum á svart fólk fjölgaði um 40% á síðasta ári miðað við árið 2019 og voru 2.755 en voru 1.930 árið á undan. Árásum á fólk af asískum uppruna fjölgaði um 70% á milli ára, voru 158 árið 2019 en 274 í fyrra. Árásum á hvítt fólk fjölgaði um 16% og voru 773 á síðasta ári.

Hvað varðar brotamenn þá voru 55% þeirra hvítir, 20% svartir, 6% af blönduðum kynþætti, 1% asískir og ekki er vitað um kynþátt 16% þeirra.

Hatursglæpum, sem beindust gegn múslimum og gyðingum, fjölgaði einnig. Gegn múslimum um 42% og um 30% gegn gyðingum.