Um klukkan 13 í gær var maður á fertugsaldri skotinn til bana á veitingastað í Skäggertorp í Linköping. Hann var nýsestur við borð sitt og maturinn var kominn á borðið þegar skothvellir glumdu. Maðurinn varð fyrir 5-6 skotum, meðal annars í höfuðið, og lést á vettvangi. Maðurinn hafði oft komið við sögu lögreglunnar og hafði tengsl við þekkt glæpasamtök.

Aftonbladet segir að tveir vinir mannsins hafi setið með honum við borðið þegar hann var myrtur. Þeir sluppu ómeiddir og eru ekki grunaðir um aðild að morðinu.

Vitni segja að tveir menn hafi flúið frá vettvangi og er þeirra nú leitað. Lögreglan var við vettvangsrannsóknir í gær og yfirheyrði fjölda manns. Enginn hefur verið handtekinn enn sem komið er.